Movie Reviews

యష్‌ నుంచి ఇలాంటి సినిమాను ఎక్స్‌పెక్ట్ చేసిన ఆడియన్స్‌కి టాక్సిక్ కొంత నిరాశ కలిగించే అవకాశం ఉంది. సినిమా మొదటి నుంచి భారీగా బిల్డ్‌అప్, స్టైల్, యష్‌ స్క్రీన్ ప్రెజెన్స్‌తో నడిపించే ప్రయత్నం చేసింది. కానీ ఆ స్థాయిలో కథ, స్క్రీన్‌ప్లే మాత్రం బలంగా అనిపించవు. కథలో కొత్తదనం పెద్దగా కనిపించదు. కొన్ని సీన్స్ ఆసక్తికరంగా అనిపించినా, మొత్తం కథనం మాత్రం చాలా చోట్ల నెమ్మదిగా సాగుతుంది. ముఖ్యంగా సెకండ్ హాఫ్‌లో స్క్రీన్‌ప్లే మరింత వీక్‌గా అనిపిస్తుంది. యాక్షన్ సీన్స్, విజువల్స్ భారీగా ఉండాలని ప్రయత్నించినా, అవి ఆశించిన స్థాయిలో ఇంపాక్ట్ ఇవ్వలేకపోయాయి.

VFX కూడా కొన్ని చోట్ల అండర్‌వెల్మింగ్‌గా అనిపిస్తుంది. ఇలాంటి భారీ బడ్జెట్ సినిమాకు కావాల్సిన విజువల్ గ్రాండియర్ పూర్తిగా కనిపించదు. మ్యూజిక్, యాక్షన్, మేకింగ్ అన్నీ ఉన్నప్పటికీ కథతో కనెక్ట్ అయ్యే ఎమోషన్ మాత్రం మిస్ అయింది. యష్‌ విషయానికి వస్తే, తన స్క్రీన్ ప్రెజెన్స్, యాటిట్యూడ్, పెర్ఫార్మెన్స్ మాత్రం సినిమాకు పెద్ద ప్లస్. కానీ హీరో ఎలివేషన్స్‌తో మాత్రమే సినిమాను ఎక్కువసేపు క్యారీ చేయడం కష్టం. కథ బలంగా ఉంటే యష్‌ పెర్ఫార్మెన్స్ ఇంకా ఎక్కువగా ఎలివేట్ అయ్యేది. మొత్తంగా టాక్సిక్‌ లో స్టైల్ ఉంది, భారీ సెటప్ ఉంది, యష్‌ ఫైర్ ఉంది… కానీ దానికి సరిపోయే స్ట్రాంగ్ కంటెంట్, ఎంగేజింగ్ స్క్రీన్‌ప్లే కనిపించలేదు. భారీ హైప్‌కు తగ్గ రిజల్ట్ మాత్రం రాలేదు.

ఓవరాల్ గా ఈ టాక్సిక్... మితిమీరిన వైలెన్స్ ఇష్టపడే వారికీ మాత్రమే..

అమీర్‌ లోగ్ సినిమా కథ చాలా పాతదే. ఓ ముగ్గురు ఖాళీగా తిరిగే కుర్రాళ్ళు, వాళ్ళని బాగుపడమని చెప్పే ఇంట్లో వాళ్ళు, వాళ్లకు సపోర్ట్ చేసే మనుషులు, వాళ్ళు లైఫ్ లో సెటిల్ అవ్వడం.. ఇదే కథ, కథాంశం. గతంలో చాలా సినిమాల్లో చూసేసాం. అయితే ఫస్ట్ హాఫ్ అంతా ముగ్గురు తిరగడంతోనే ఒక అరగంట రొటీన్ సీన్స్ తో సాగదీశారు. ముగ్గురు లైఫ్ లో సెటిల్ అవుదాం అనే దగ్గర్నుంచి కథ కాస్త ఆసక్తిగా నడుస్తుంది. ఆఫీస్ టీమ్ వర్సెస్ బస్తి క్రికెట్ మ్యాచ్ తో ఎవరు గెలుస్తారు? నెక్స్ట్ ఏమవుతుంది అనే బ్యాంగ్ తో సెకండ్ హాఫ్ మీద ఆసక్తి అయితే పెంచారు. ఇక సెకండ్ హాఫ్ లో క్రికెట్ అయిపోయి బిర్యానీ చుట్టూ కథ నడుస్తుంది. సెకండ్ హాఫ్ లో కొన్ని ఎమోషనల్ సీన్స్ బాగానే వర్కౌట్ అయ్యాయి. 

ఇక సినిమాలో అక్కడక్కడా కామెడీ బాగానే వర్కౌట్ అయింది. క్లైమాక్స్ లో అధికారికంగా ప్రకటించకపోయినా పార్ట్ 2 కి లీడ్ ఇచ్చారు. ఎడిటింగ్ లో చాలా ల్యాగ్ సీన్స్ కట్ చేస్తే బెటర్. పాత కథే అయినా హైదరాబాద్ బస్తి బ్యాక్ డ్రాప్ లో కొత్తగా ప్రయత్నించాడు దర్శకుడు. మొత్తంగా ‘అమీర్ లోగ్’ ఓ ముగ్గురు హైదరాబాదీ బస్తి కుర్రాళ్ళ కథ. ఈ సినిమాకు 2.5 రేటింగ్ ఇవ్వొచ్చు.

హైదరాబాదీ నేటివిటీ, ఫ్రెండ్షిప్, యూత్‌ఫుల్ మూమెంట్స్‌తో వచ్చిన ‘అమీర్ లోగ్’ అక్కడక్కడా బాగానే ఎంటర్‌టైన్ చేస్తుంది. కొత్త ఆర్టిస్టుల పెర్ఫార్మెన్స్, కామెడీ, ఎమోషన్స్ కొన్ని సీన్స్‌లో వర్క్ అయ్యాయి.

అయితే రొటీన్ కథ, ఊహించగలిగే సీన్స్, వీక్ క్లైమాక్స్ సినిమాకు మైనస్. దర్శకుడు చెప్పాలనుకున్న పాయింట్ మాత్రం ఇంప్రెస్ చేస్తుంది.

ఫైనల్‌గా: ఫ్రెండ్స్‌తో కలిసి చూస్తే ఓకే అనిపించే టైమ్‌పాస్ మూవీ. కానీ కొత్తగా ఏదైనా ఆశిస్తే మాత్రం నిరాశ తప్పదు!

హైదరాబాద్ నేటివిటీ డ్రామాలు ఇష్టపడే ఆడియన్స్ కి ఈ అమీర్ లోగ్ నచ్చే అవకాశం ఉంది. 

ఈ వారం థియేటర్లలోకి వచ్చిన చిన్న సినిమాల్లో ‘అమీర్ లోగ్’ కూడా ఒకటి. పూర్తిగా కొత్త నటీనటులతో తెరకెక్కిన ఈ యూత్‌ఫుల్ డ్రామా, ఫ్రెండ్షిప్ నేపథ్యంలో పక్కా హైదరాబాదీ నేటివిటీతో ప్రేక్షకుల ముందుకు వచ్చింది. అయితే సినిమాకు ఆడియన్స్ నుంచి బిలో యావరేజ్ రెస్పాన్స్ వస్తోంది. సినిమాలో దర్శకుడు చెప్పాలనుకున్న పాయింట్ మాత్రం సినిమాకు ప్లస్‌గా నిలుస్తుంది.

అయితే అసలు సమస్య కథ, కథనంలోనే కనిపిస్తుంది. సినిమా చూస్తున్నంతసేపు చాలా సీన్స్ ఎక్కడో చూసిన ఫీలింగ్ కలుగుతుంది. అంతేకాదు, తర్వాత ఏం జరగబోతుందో ముందే ఊహించేయగలిగేలా స్క్రీన్‌ప్లే సాగుతుంది. దీంతో ఫ్రెష్‌నెస్ మిస్ అవుతుంది.

ఫస్ట్ హాఫ్‌లో అక్కడక్కడా మంచి మూమెంట్స్ ఉన్నప్పటికీ, రొటీన్ సీన్స్ ఎక్కువగా కనిపిస్తాయి. ఇక క్లైమాక్స్ వీక్‌గా ఉండటం సినిమాకు మరో మైనస్. దీంతో సినిమా ఇచ్చే ఇంపాక్ట్ చివరి వరకు కొనసాగదు.

‘అమీర్ లోగ్’ అనేది ఫ్రెండ్స్ బ్యాచ్ కలిసి చూస్తే కొంతవరకు ఎంజాయ్ చేసే యూత్‌ఫుల్ ఎంటర్‌టైనర్. కామెడీ, ఎమోషన్స్, హైదరాబాదీ నేటివిటీ కొన్ని చోట్ల ఆకట్టుకున్నా.. రొటీన్ కథనం, ఊహించగలిగే సన్నివేశాలు, బలహీనమైన క్లైమాక్స్ నిరాశపరుస్తాయి.

ఫ్రెండ్స్‌తో కలిసి టైమ్‌పాస్ కోసం ఓసారి ట్రై చేయొచ్చు.. కానీ పెద్దగా ఎక్స్‌పెక్టేషన్స్ పెట్టుకోకపోవడమే బెటర్!

రవితేజతో శివ నిర్వాణ సినిమా అని, అయ్యప్ప మాల బ్యాక్ డ్రాప్ అని "ఇరుముడి"ని ప్రకటించడంతోనే ఈ సినిమాపై అంచనాలు నెలకొన్నాయి. సినిమాలో అయ్యప్ప స్వామి ఎపిసోడ్స్ అన్ని కూడా బాగున్నాయి. అయ్యప్ప మాలలు వేసే భక్తులు ఆ సీన్స్ కి కచ్చితంగా కనెక్ట్ అవుతారు. యాక్షన్ సీక్వెన్స్ లు అన్ని బాగున్నాయి. ప్రీ క్లైమాక్స్ నుంచే ప్రేక్షకులను ఏడిపించేసారు. అమ్మాయిలను ధైర్యంగా పెంచాలి, కూతుళ్లు అన్ని ఇంట్లో వాళ్లకు చెప్పాలి అని మెసేజ్ ని చాలా చక్కగా చూపించారు. అయితే ఆ అమ్మాయిల సంబంధించిన సీన్స్ కొంత ఇబ్బందిగా, హార్డ్ హిట్టింగ్ గా అనిపించవచ్చు కొంతమందికి. 

సినిమా అంతా అయిపోయిన తర్వాత ఏదో అసంతృప్తి అనిపిస్తుంది. కానీ చివర్లో మణికంఠ పాత్ర చెప్పిన ఒక్క డైలాగ్ తో సినిమా పరిపూర్ణం అయింది అనే ఫీల్ వస్తుంది. ఇటీవల సినిమా థియేటర్స్ నుంచి ఏడుస్తూ బయటకువచ్చిన సినిమాలు రాలేదు. చాన్నాళ్ల తర్వాత ఒక సినిమా చూసిన తర్వాత ప్రేక్షకులు ఏడుస్తూ బరువైన హృదయంతో బయటకు వస్తారు. అయితే కమర్షియల్ గా చూస్తే ఈ సినిమాని కార్తీక మాసం, అయ్యప్ప మాల సీజన్ లో రిలీజ్ చేసి ఉంటే ఇంకా ఎక్కువ హైప్, రీచ్ వచ్చేది. చాన్నాళ్ల తర్వాత రవితేజ హిట్ కొట్టాడు అని చెప్పొచ్చు. ఫ్యామిలీతో కలిసి ఈ సినిమాని చూడొచ్చు. మొత్తంగా ‘ఇరుముడి’ తన కూతురు, ఊళ్ళో ఆడపిల్లల కోసం నిలబడే ఓ మిడిల్ క్లాస్ తండ్రి కథ అయ్యప్ప స్వామి మాలతో యాక్షన్ క్రైమ్ ఎమోషనల్ సినిమాగా మెప్పిస్తుంది.

నిజాలు ఎప్పుడు కఠినంగానే ఉంటాయి. వాటిని డైజెస్ట్ చేసుకోవడం అంత ఈజీ కాదు.. "ఇరుముడి" సినిమాలో అలాంటి కఠినమైన నిజాలని చెప్పాడు శివ నిర్వాణ. ఈ సినిమా కమర్షియల్ గా ఆడుతుందా లేదా అనేది తెలియదు కానీ ఖచ్చితంగా ఒక మంచి సినిమా అయితే తీసాడు. ఆడపిల్ల తండ్రులకు ఈ సినిమా చూస్తున్నప్పుడు భయమేస్తుంది.. అలాంటి కొన్ని మనసును హత్తుకునే సన్నివేశాలు ఉన్నాయి. అయ్యప్ప స్వామి నేపథ్యం ఉన్నా కూడా ఇది పక్కా కమర్షియల్ సినిమా. తెలిసిన కథనే కానీ సరికొత్త స్క్రీన్ ప్లేతో చెప్పాడు శివ నిర్వాణ.. 

ఆడపిల్లకు భయం ఉండకూడదు అనే లైన్ ఈ సినిమాతో చెప్పాలనుకున్నాడు శివ. దానికి రవితేజ లాంటి యాక్టర్ తోడయ్యేసరికి మెసేజ్ బాగానే పాస్ అయింది. ఎమోషనల్ సినిమా కాబట్టి స్లోగానే ఉంటుంది. అక్కడక్కడ కొన్ని సన్నివేశాలు బాగా హార్డ్ హిట్టింగ్ గా ఉన్నాయి. ఇరుముడిలో లోపాలు కూడా బాగానే ఉన్నాయి.. కానీ వాటిని కంటెంట్ తో కవర్ చేశాడు శివ నిర్వాణ. ఈ క్రమంలో అక్కడక్కడ ఆయన స్లో అయ్యాడు కానీ ఓవరాల్ గా మంచి మెసేజ్ ఇచ్చాడు. ఓవరాల్ గా ఇరుముడి.. మెసేజ్ ఓరియెంటెడ్ సినిమా..!

రవితేజ అంటే మాస్ ఎలివేషన్స్, ఎనర్జీ, కామెడీ, పంచ్ డైలాగ్స్ గుర్తొస్తాయి. కానీ **‘ఇరుముడి’**లో మాత్రం ఆయనను పూర్తిగా మరో కోణంలో చూపించే ప్రయత్నం చేశాడు దర్శకుడు శివ నిర్వాణ. ఒక సాధారణ తండ్రి.. తన కూతురికి జరిగిన అన్యాయాన్ని తట్టుకోలేక చేసే పోరాటమే ఈ కథకు అసలు బలం. మొదటి భాగంలో కుటుంబం, ఊరి నేపథ్యం, త్రినాథ్ క్యారెక్టర్‌ను నెమ్మదిగా ఎస్టాబ్లిష్ చేసిన దర్శకుడు.. కథ అసలు మలుపు తిరిగిన తర్వాత డ్రామాను బలంగా నడిపించాడు. ముఖ్యంగా క్లైమాక్స్‌కు ముందు వచ్చే ఎమోషనల్ సీన్స్ ప్రేక్షకులను గట్టిగా హిట్ చేస్తాయి.

త్రినాథ్‌గా రవితేజ నటన ఈ సినిమాకు బిగ్గెస్ట్ ప్లస్. మాస్ ఇమేజ్‌ను పక్కనపెట్టి బాధ, కోపం, కసితో కూడిన పాత్రను ఆయన బాగా క్యారీ చేశాడు. అమ్మాయిలపై జరిగే అన్యాయం, తండ్రి ఆవేదనను కలిపి చెప్పిన విధానం మెప్పిస్తుంది. అయితే కొన్ని సన్నివేశాలు, కథలోని కొన్ని అంశాలు అందరికీ సులభంగా కనెక్ట్ కాకపోవచ్చు. అయినా కమర్షియల్ ఫార్ములాకు భిన్నంగా వెళ్లి ఎమోషన్‌ను నమ్ముకున్న ‘ఇరుముడి’.. రవితేజ కెరీర్‌లో డిఫరెంట్ అటెంప్ట్‌గా నిలుస్తుంది.

మాస్ మహారాజా రవితేజ ఈసారి తన రెగ్యులర్ మాస్ ఫార్ములాకు భిన్నంగా **‘ఇరుముడి’**తో ప్రేక్షకుల ముందుకొచ్చాడు. శివ నిర్వాణ దర్శకత్వంలో తెరకెక్కిన ఈ చిత్రం.. త్రినాథ్ అనే సాధారణ అరటిపళ్ల వ్యాపారి జీవితంలో జరిగే విషాద ఘటన, ఆ తర్వాత అతడి పోరాటం చుట్టూ తిరుగుతుంది. కూతురు మణెమ్మకు జరిగిన అన్యాయం, ఊర్లో అమ్మాయిలపై జరుగుతున్న దారుణాల వెనుక అసలు నిజాన్ని తెలుసుకునే క్రమంలో త్రినాథ్ చేసే పోరాటం కథకు ప్రధాన బలం. ముఖ్యంగా చివరి అరగంటలో డ్రామా, ఎమోషన్ పీక్స్‌కు చేరుతాయి. రవితేజ తన పాత్రలోని బాధ, కోపం, కసిని అద్భుతంగా పలికించాడు.

కథలో కొన్ని అంశాలు సగటు ప్రేక్షకుడికి జీర్ణించుకోవడం కాస్త కష్టమే అయినా.. దర్శకుడు కమర్షియల్ మూసను పక్కనపెట్టి చెప్పాలనుకున్న పాయింట్‌ను బలంగా తెరకెక్కించాడు. ఓవరాల్‌గా ‘ఇరుముడి’ మాస్ కంటే ఎమోషన్‌ను నమ్ముకున్న సినిమా. రవితేజ పెర్ఫార్మెన్స్, బలమైన క్లైమాక్స్, హృద్యమైన మెసేజ్ సినిమాకు ప్రధాన హైలైట్స్. ఫైనల్ గా డివోషనల్ టచ్ ఉన్న ఒక మెసేజ్ ఓరియెంటెడ్ థ్రిల్లర్. 

నిర్మాత ఎమ్మెస్ రాజు దర్శకుడిగా తెరకెక్కించిన అగధ మూవీ ఆడియన్స్ నుండి మిక్స్డ్ రెస్పాన్స్ అందుకుంది. దైవం, దుష్టశక్తి చుట్టూ సాగే కథలు ప్రేక్షకుల్లో ఎప్పుడూ ఆసక్తిని రేకెత్తిస్తూనే ఉంటాయి. ఇలాంటి కాన్సెప్ట్‌లో కథ ఎక్కడ మొదలై, ఎలా ముగుస్తుందో ముందే అంచనా వేసినా.. దైవశక్తిని ఎలా చూపించారు? దుష్టశక్తి ఎలాంటి విధ్వంసం సృష్టించింది? దాని వల్ల ఎలాంటి సమస్యలు తలెత్తాయి? అన్న అంశాలే సినిమాను ఆసక్తికరంగా మారుస్తాయి. దర్శకుడు ఎంఎస్ రాజు మాటల్లో ‘అగధ’కు భారీగా బిల్డప్ ఇచ్చినప్పటికీ.. తెరపై మాత్రం ఆ స్థాయిలో ప్రభావం చూపించలేకపోయింది.

ముఖ్యంగా సెకండాఫ్‌పై పెట్టుకున్న అంచనాలు నిరాశపరుస్తాయి. కథనం మరింత ఆసక్తికరంగా సాగాల్సిన చోట నెమ్మదించడం సినిమాకు మైనస్‌గా మారింది. ఇక బ్లాక్ మ్యాజిక్‌ను చూపించిన తీరు కూడా అంతగా ఆకట్టుకోదు. అయితే నిర్మాణ విలువలు మాత్రం బాగున్నాయి. టెక్నికల్ టీమ్ సినిమాకు ప్రధాన బలంగా నిలిచింది. కెమెరా వర్క్, బ్యాక్‌గ్రౌండ్ స్కోర్ వంటి అంశాలు సినిమాను నిలబెట్టే ప్రయత్నం చేశాయి. ఎమ్మెస్ రాజు కథ కొత్తగా ఎంచుకున్నా, ట్రీట్మెంట్ పాత గానే ఉంది. ఎలాంటి అంచనాలు లేకుండా చూస్తే అగధ థ్రిల్లర్ మూవీ లవర్స్ కి నచ్చే ఛాన్స్ ఉంది. 

దేవుడికి, దెయ్యానికి మధ్య జరిగే పోరాటం, చివరికి రాక్షసత్వం మీద దైవత్వం గెలవడం అనే పాయింట్ ఎప్పుడూ ప్రేక్షకులకు ఆసక్తికరంగానే ఉంటుంది. దర్శకుడు ఎమ్మెస్ రాజు గతంలో తీసిన ‘దేవి’ సినిమా ఛాయలు ఈ చిత్రంలో ఎక్కువగా కనిపిస్తాయి. అయితే ఆ పాత సినిమాలో ఉన్నంత బలమైన భావోద్వేగాలు కానీ, కట్టిపడేసే విషయాలు కానీ ఇందులో కాస్త లోపించాయి. కేవలం ఆ సినిమా వాతావరణాన్ని మాత్రమే ఇక్కడ వాడుకున్నట్లు స్పష్టమవుతుంది. ఇలాంటి సినిమాలకు బిగువైన స్క్రీన్ ప్లే చాలా అవసరం. కానీ ఇందులో అదే మిస్ అయింది. 

టెక్నికల్ గా ఒక హారర్ సినిమాకు కావాల్సిన సాంకేతిక హంగులన్నీ ఈ చిత్రంలో పుష్కలంగా ఉన్నాయి. కానీ పేలవమైన బోరింగ్ స్క్రీన్ ప్లే కారణంగా ఆడియన్స్ ని అంతగా మెప్పించలేదు. రెగ్యులర్ మూవీ లవర్స్ ఒకసారి చూసేలానే ఉంది. ఓవరాల్ గా అగధ.. కొంచెం థ్రిల్.. మిస్టిక్ థ్రిల్లర్..! 

దర్శక నిర్మాత ఎమ్మెస్ రాజు డైరెక్ట్ చేసిన లేటెస్ట్ మూవీ "అగధ". కామాక్షి భాస్కర్ల మెయిన్ లీడ్ లో నటించిన ఈ మూవీ ఆడియన్స్ నుండి బీలో యావరేజ్ రెస్పాన్స్ అందుకుంది. బట్ ఈ సినిమా స్టోరీ పాయింట్ కొత్తగా ఉన్నా, దానికి తగ్గ ఎంగేజింగ్ స్క్రీన్ ప్లే మాత్రం డైరెక్టర్ రాసుకోలేకపోయాడు. 

ఇంట్రెస్టింగ్ సీన్లు కూడా పెద్దగా ఏం లేవు. థ్రిల్లర్ మూవీ అంటే ట్విస్టులు, థ్రిల్స్, హారర్ వంటి ఎలిమెంట్స్ చాలా ఉండాలి. కానీ ఈ సినిమాలో అవి ఊహించిన దానికంటే తక్కువే ఉన్నాయి. నటీనటుల పెర్ఫార్మన్స్ బాగున్నాయి. ప్రొడక్షన్ వాల్యూస్ డీసెంట్ గా ఉన్నాయి. ఓవరాల్ గా ఈ మూవీ వన్ టైం వాచబుల్. 

బ్రష్ కొనివ్వలేదు అని కొడుకుపై కేసు వేసాడంటూ పళ్ళ బురుసు సినిమా టీజర్ చూడగానే తెలంగాణ విలేజ్ బ్యాక్ డ్రాప్, పేరెంట్స్ ఎమోషన్ కథ అని ముందే అర్ధమయింది. ఫస్ట్ హాఫ్ అంతా శంభు పళ్ళ బురుసు కోసం చేసే ప్రయత్నాలు, తిరుపతి కూతురు పెళ్లి, ఊళ్ళో శంభుతో ఉండే ఇంకో నలుగురు ముసలి తాతలతో సరదాగా కామెడీగా సాగుతుంది. ఇక సెకండ్ హాఫ్ మొదట కాస్త కామెడీగా సాగినా తర్వాత అంతా ఎమోషనల్ గా సాగుతుంది. క్లైమాక్స్ లో ఓ కొత్త పాయింట్ ని తీసుకొని దర్శకుడు మరింత ఎమోషనల్ చేసాడు.

ఒంటరితనం ఎంత భయంకరమైనది, ముసలితనంలో అది ఇంకా ఎంత కష్టంగా ఉంటుంది అనే మెసేజ్ ని బాగా చూపించారు. అయితే క్లైమాక్స్ హ్యాపీ ఎండింగ్ ఇచ్చారు కానీ ఎమోషనల్ గా ముగిస్తే ప్రేక్షకుడు రియాలిటీకి కనెక్ట్ అయి బరువైన హృదయంతో బయటకు వెళ్ళేవాడు. మొత్తంగా ‘పళ్ళ బురుసు’ సినిమా కొడుకు పట్టించుకోవట్లేదని ఓ ముసలి తండ్రి పడే ఆవేదనను నవ్వించి ఏడిపిస్తూ చూపించిన కథ. ఈ సినిమాకు 2.75 రేటింగ్ ఇవ్వొచ్చు.